Segundo día!

A primeira hora do meu segundo día proporcionáronme o que vai ser o meu horario nos próximos días. O martes tócame pola mañá cos nenos e nenas de tres anos. E pola tarde co alumnado de catro anos.

Comezamos a clase con varias mestras, posto que na aula hai varios alumnos con diferentes características. Unha nena fala en inglés, un neno apenas fala todavía, un neno ten problemas severos de visión e outro neno posiblemente teña algún tipo de problema sen diagnosticar polo momento.

Ao chegar á clase comezou a rutina diaria de quitar os chaquetóns e poñer os mandilóns. Cando todos estiveron por fin sentados no seu sitio, a mestra escolleu aos seus encargados do día. Estes tiveron que dicir o día no que estábamos e o tempo que facía fora cunhas imaxes representativas. Tamén tiveron que formar os seus nomes con letras imantadas, guiándose polas tarxetas que a mestra tiña preparadas. Mentres tanto, o resto da clase comezou a xogar con pezas de encaixar. Despois de recoller todas as pezas, a profe contounos dous contos, e tras recibir a noticia de que non podíamos saír ao patio polo tempo, comezamos a xogar cos animais. Posteriormente as mestras repartiron pezas de gomaeva de diferentes formas e pezas rectangulares de cores para que os rapaces e rapazas fixeran “casiñas” para os animais. Tras recoller todos os materiais, outra profe, quen se incorporou á clase tras o recreo, contounos o conto do polo Pepe, para calmarnos antes de ir a comer.

Os nenos estaban considerablemente alterados, segundo me dixo a mestra. Tamén destacou a presenza doutra profe, que ven da ONCE, quen nos trouxo unha mesa especial para o neno con dificultades visuais, polo que levantou a intriga de todos os nenos e nenas.

Á tarde a clase de catro anos comezou calmándonos un pouco, pois viñan alterados do comedor. Cando o conseguimos, seguimos cun conto que nos contou, “Gato Guille y los monstruos”, que nos mantivo moi concentrados e intrigados sobre os monstruos que escoitaba o protagonista. De seguido, contounos o conto “Corre, corre, cabaciña”, que os nenos xa coñecían polo que algunhas veces se anticipaban ao que nos contaba a mestra. Para rematar, cantamos todos xuntos a canción da cabaciña, que relata o conto en forma de canción.

Despois, cada mesa tivo o seu xogo de encaixes, con diferentes versións, cos que estivemos xogando ata a hora de recoller todo para marchar á casa. Mentres xogaban, a mestra ía mandándolles por turnos a quitar o mandilón e poñer a chaqueta, igual que preparar a mochila para cando chegara o momento de marchar.