ÚLTIMO DÍA!

Último día no cole. 

Comecei o día cos nenos e nenas de catro anos, a encargada fixo as súas tarefas despois de que todos estivéramos preparados. Despois, sentáronse nos seus sitios para facer a tarefa do conto que levaron esa semana cada un.

De seguido, marchei cos rapaces e rapazas de tres anos, estes estaban xogando cos bonequiños de plástico e indo ao baño cunha das profes, á súa vez, ían con outra delas para rematar a tarefa na que lle poñían pelo a un debuxo.

Recolleron todo e merendaron as galletas e os palitos, sempre diferenciando os do neno con intolerancia á lactosa. Neste momento, marchan dúas das profes facer uns recados. A profe que quedou, mandoulles poñerse á fila e marchamos para o patio.

Unha vez alí, no patio cuberto, a miña intención era volver para falar cunha mestra, pero as profes dixéranlles que era o meu último día, polo que estaban moi mimosos e preguntaban por que me tiña que marchar todo o tempo. Por todo isto, quedeime con eles no recreo. Ademais, avisáronme de que me fixeran un debuxo, os de catro anos, e que me tiñan unha sorpresa, os de cinco anos, pero para despois de comer.

Á volta do recreo, volvín cos nenos e nenas de  catro anos. 

Regaláronme un libriño de debuxos que me fixeron eles mesmos, para que me acordara deles, e explicáronme o que era cada un.

Despois, dividíronse nos recantos de puzzles, coches e cociña, e foron ao baño por quendas. Mentres tanto, a mestra estivo revisando documentos para propoñer un cambio de horario para o centro, para que teña unha xornada de mañá, e xogamos cos rapaces e rapazas. Recolleron todo e marchamos para o comedor.

Á tarde, fun cos nenos e nenas de catro anos. Fomos á biblioteca para cambiar os libros que tiñan en préstamo, por iso tiven que ir chamar á mestra encargada, para resolver unha dúbida, pois unha rapaza perdeu un libro e non sabiamos que facer. Cando volvemos para a aula preparamos as mochilas e lemos o conto “Cars 2”.

Antes de marchar, déronme moitos abrazos e bicos. Case me esmagan entre todos! Tamén viñeron os alumnos e alumnas de cinco anos, que me trouxeron un libro de regalo, de parte do centro, e un cos seus debuxos, púxenme a velos e contábanme orgullosos quen o fixera. Antes de marcharse déronme máis bicos e apertas. Marchamos todos para a entrada, onde se dividen entre transporte escolar ou patio, xa que os veñen a buscar. Alí estivemos falando un pouquiño máis e despedímonos para marchar.

Antes de irme, fun falar coa mestra de tres anos, a que tamén me tiña preparado un agasallo.

Foi unha experiencia moi bonita, que me trouxo moi bos momentos e experiencias, coa que aprendín moito, e que me encantará repetir o ano que vén.

Tamén foi unha bonita forma de coñecer máis xente do entorno da educación, vivir unha nova experiencia, ver o centro no que eu estudei dende outra perspectiva moi diferente. Do mesmo xeito que coñecer a unha morea de rapaces e rapazas, que estou segura de que se os atopo na rúa me virán saudar entusiasmados e a contarme algunha cousa, é dicir, gañei uns amiguiños e amiguiñas moi riquiños.

En definitiva, foi un tempo inigualable, que repetiría as veces que fixera falla, aprendendo cousas novas todos os días.